El grupu
Skama la Rede ye, quiciabes, el grupu abanderau de la segunda xeneración del llamau "Rock Astur". La banda, nacida n'ochobre del 2003, recueye'l testigu y bebe directamente de bandes tovía n'activo como Dixebra y Los Berrones, qu'entamaron esti movimientu a mediaos de los años 80.
La formación, que supo influenciase y adaptase, tien conseguío un soníu propiu y reconocible qu'amiesta'l ska y el punk como principales ingredientes pero con dosis xustes y bien aprovechaes de rock, reagge y folk nes que destaca la utilización de dos instrumentos de vientu bien estremaos: la trompeta y la gaita tradicional asturiana.
Pero si dalgo caracteriza a Skama La Rede ye l'empleu esclusivu de la llingua asturiana nes sos lletres, tanto en composiciones propies como adaptando testos fechos por encargu a collaboradores del grupu como'l periodista y escritor David Artime "Roxu".
-
Fabián Díez Trombon
-
Jose Ángel Rodriguez "Llou" Bateria
-
Fer Ortíz Trompeta
-
Xandru Vega Gaita
-
Eduardo Fernandez Guitarra
-
Fonsu Sanchez Bajo Electrico
-
Miguel Fernandi "Burilo" Voz
Skama La Rede ye un grupo de denuncia y crítica social, espíritu combativu, mirada internacionalista ensin escaecer lo local y con un evidente sentíu del humos a la hora d'espeyar les sos lletres. Podríemos dicir que los testos de la banda son una especie de crónica moderna de l'actualidá d'Asturies y del mundu na última década.
Son, amás, musicos coherentes y que cumplen col exemplu al actuar en numeroses ocasiones renunciando al caché pa causes sociales qu'apoyen ensin descansu.
Sicasí, y sobre manera col pasu del tiempu, Skama La Rede tien fuxío del panfletismu con cantares muncho más reflexivos y abiertos a la interpretación de los sos siguidores y cola introducción per momentos d'otres temátiques como'l desamor o la realidá cotidiana fuera de la reivindicación.
El grupu, formau orixinariamente por músicos de los conceyos de Carreño y Gozón y con un llionés afincaú en Candás nes sos files, incorporó na última dómina a componentes del conceyu de Villaviciosa. Esta circunstancia fainos presumir arguyosos del carácter norteñu y marineru de la banda al que tamién fai referencia'l so nome. "Escamar la rede" ye una espresión de los pescadores de la costa central asturiana que se refier al arte de robar el pescáu en redes ayenas.